ចំប៉ាបាត់ដំបង
ក្នុងចំណោមបទចម្រៀងដែលតែងបំពេរអារម្មណ៍មនុស្សទាំងឡាយ ដែលជាស្នាដៃរបស់អធិរាជសំឡេងមាស ស៊ីន ស៊ីសាមុត ច្រើនតែនិយាយរៀបរាប់ដល់ខេត្តនីមួយៗក្នុងប្រទេសកម្ពុជាយើង មិនដែលខានឡើយ ហាក់ដូចជាចង់ដាស់តឿនក្រើនរំលឹកកូនខ្មែរ ឲ្យស្គាល់ពីភាពស្រស់ត្រកាលនៃទឹកដីរបស់ខ្លួន ឲ្យចាំពីទឹកដីរបស់ខ្លួន ទោះជាលោកបានបាត់បង់ជីវិតទៅហើយក្ដី ក៏ឆ្លៀតឱកាសបានបំពេញឧត្ដមគតិស្នេហាជាតិបន្តិចដែរ។
ក្នុងចំណោមស្នាដៃដំបូងៗរបស់លោក គឺបទ “ចំប៉ាបាត់ដំបង” នេះហើយ ដែលធ្វើឲ្យលោក ស៊ីន ស៊ីសាមុត ចាប់ល្បីខ្លាំងបំផុតនៅក្នុងវិស័យសិល្បៈចម្រៀង។ តោះ! ស្ដាប់ទាំងអស់គ្នា!
១- ឱ! បាត់ដំបងបណ្តូលចិត្តអើយ ខ្ញុំសូមលាហើយលាទាំងអាល័យ តាំងពីខ្លួនខ្ញុំបានឃ្លាតទៅឆ្ងាយ ខ្វល់ខ្វាយនឹកស្តាយពុំមានពេលល្ហែ ។
២- ឱ! បាត់ដំបងកងកម្មវាសនា ដែលខ្ញុំប្រាថ្នាគ្មានពេលទំនេរ បើសិនជាគូខ្ញុំពីបុព្វេ សូមឱ្យមាសស្នេហ៍ នឹកឃើញគ្រាដើម ។
បន្ទរ- កន្លងយូរឆ្នាំចាំទេស្ងួន មានតែរូបអូនដែលជាដង្ហើម ចំពោះនួនល្អងចិត្តបងសង្ឃឹម សង្ឃឹមញញឹមថាបានជាគូវាសនា ។
៣- ឱ! បាត់ដំបងខ្ញុំប៉ងយូរហើយ តើថ្ងៃណាឡើយបានយល់ភក្ត្រា ចិត្តជ្រួលច្របល់រាល់ថ្ងៃខ្លោចផ្សា ចង់បានចំប៉ាបាត់ដំបងអើយ ។(ច្រៀង បន្ទរ និង ៣- ឡើងវិញ)
បទ “ចំប៉ាបាត់ដំបង” នេះក៏មានប្រវត្តិគួរឲ្យចាប់អារម្មណ៍ណាស់ដែរ តែដោយសារតែគ្មានឯកសារគ្រប់គ្រាន់នឹងអាចបញ្ជាក់រឿងរ៉ាវឲ្យច្បាស់លាស់ គ្រាន់តែបានដឹងថា គឺបទនេះហើយ ដែលធ្វើឲ្យគ្រួសារលោក ស៊ីន ស៊ីសាមុត បែកប្រេះស្រាំអស់រយៈពេលជិតប្រាំពីរឆ្នាំ។ (ឯកសារពិគ្រោះ៖ CEN.COM.KH)
ម្យ៉ាងទៀត បទ “ចំប៉ាបាត់ដំបង” ក៏ត្រូវបានគេយកលំនាំច្រៀងជាបទបារាំងមួយផងដែរ ដែលមានចំណងជើងថា Mon Amour ។ បទនេះនិពន្ធដោយ Madame Bun Veary និងច្រៀងដោយនិស្សិតសាលាតិចណូម្នាក់ឈ្មោះ ឃឿន រតនៈ។
I. Tous les dimanches je vais te voir
Un grand espoir de t’avouer
Jour après jour j’ai des regrets
J’ai peur de perdre la face
II. Je n’ose pas de te déclarer
Même je te connais un peu plus
Pour cet amour un peu précoce
Je ne me sens pas à laise
R. J’envoie des milliers de textos
Et des cadeaux pour te rassurer
Pour que tu saches mon secret
Mon vieux secret, je n’ose pas te dire
III. Sais tu que je t’aime tant
Depuis longtemps comme je respire
Tu es mon rêve, ma chérie
Peux-tu me dire que tu m’aimes?
ចង្វាក់ភ្លេងបទនេះមានលក្ខណៈយឺតជាងបទខ្មែរ…សូមអញ្ជើញស្ដាប់ទុកជាការអផ្សុក 
ឯកសារ៖
- ចំប៉ាបាត់ដំបង (mp3); File Size: 2.63 MB
- Mon amour (mp3); File Size: 7.98 MB
ខៀវ រឺបៃតង?
ក្នុងចំណោមពាក្យខ្មែរ ដែលមានភាពចម្រូងចម្រាសមិនចេះចប់មិនចេះហើយនោះ ខ្ញុំសង្កេតឃើញថា អ្នកខ្លះនៅតែច្រឡំគ្នារវាងការញែកពណ៌ខៀវ និងពណ៌បៃតងដដែល។ តើហេតុអ្វីទៅ? ឧទាហរណ៍ ភ្លើងសញ្ញាចរាចរណ៍ដែលអនុញ្ញាតឲ្យអ្នកដំណើរឆ្លងទៅបាន ម៉េចក៏នាំគ្នាថាភ្លើងពណ៌ខៀវដូច្នេះ? ហើយនៅក្នុងវចនានុក្រម អង់គ្លេស-ខ្មែរ មួយចំនួនក៏បកពាក្យ Green ថាជាពណ៌ខៀវដែរ។
តាមវចនានុក្រមខ្មែរ រៀបរៀងដោយសម្ដេចសង្ឃរាជជួន ណាត បានបញ្ជាក់យ៉ាងច្បាស់ពីន័យនៃពណ៌ទាំងពីរនេះ៖
- ខៀវ ៖ ពណ៌ផ្ទៃមេឃជាប្រក្រតី។
- បៃតង ៖ (ស.)(បៃត្ចង អ. ថ. បៃតង ន. “ស្លឹកចេក”) ពណ៌ស្លឹកចេកស្រស់ ៖ ពណ៌បៃតង, សំពត់បៃតង។
ដូច្នេះ យើងគួរតែដឹងថា៖
ខៀវ
បៃតង
មនុស្សឆ្កួតរចនារូបព្រះបាទជ័យវរ្ម័នទី ៧
ក្នុងកាសែតកោះសន្តិភាពចុះផ្សាយថ្ងៃព្រហស្បតិ៍ ទី៤ ខែសីហា មានព័ត៌មានចម្លែកមួយ ដែលបានលើកឡើងពីបុរសម្នាក់ដែលហ៊ានទៅគូរទឹកថ្នាំក្រវេមក្រវាមលើរូបសំណាកព្រះបាទជ័យវរ្ម័នទី ៧ ដែលតាំងនៅក្នុងសួនច្បារលោកស ខេង ក្នុងខេត្តបាត់ដំបង។ គួរឲ្យខឹងណាស់មែនទេ? ចាំមើលទៀតសិន! ក្រោយអំពីការដេញចាប់បាន និងការសួរចម្លើយ នគរបាលក៏សន្និដ្ឋានថាជននោះជាមនុស្សឆ្កួត។ ក្នុងការសួរចម្លើយផងដែរ បុរសម្នាក់នោះក៏បានរៀបរាប់ពីដើមហេតុដើមចម ដែលខ្លួនធ្វើដូច្នេះ។ ហេតុផលគាត់ ពេលស្ដាប់ទៅពិតជាគួរឲ្យស្ញើចមែនទែន។
គាត់ថា នៅថ្ងៃ ៣១ កក្កដា ពេលទៅហាត់ប្រាណជាមួយគេឯងរាល់ដងនៅសួនច្បារលោក ស ខេង គាត់ក៏ប្រទះឃើញព្រះនេត្ររបស់ព្រះបាទជ័យវរ្ម័នទី ៧ បិទ ដូច្នោះហើយគាត់ក៏យកទឹកថ្នាំទៅគូរបន្ថែមភ្នែក ដើម្បីឲ្យទ្រង់មើលឃើញ មនុស្សលោក ដែលលោភលន់មិនចេះស្កប់មិនចេះស្កល់។ រួចហើយគាត់គូរថែមទឹកភ្នែកទៀត មានស មានខ្មៅ។ ទឹកភ្នែកពណ៌ខ្មៅ តំណាងឲ្យទឹកភ្នែកដែលយំពេលឃើញមនុស្សចេះតែប្រព្រឹត្តខុស ចំនែកឯទឹកភ្នែកពណ៌សតំណាងឲ្យទឹកភ្នែកដែលយំដោយក្ដីរំភើប។ លើសពីនេះគាត់ថែមទាំងគូរឆ្អឹងជំនីរថែមពីលើទៀត។ ដល់ពេលគេសួរគាត់ទៅ គាត់ក៏ថា ដែលមានមនុស្សណាអត់មានឆ្អឹងជំនីរនោះ ^_^” ក្រោយពីគេសួរចម្លើយ និងសន្មតថាគាត់មានជម្ងឺវិកលចរិតហើយ បុរសនោះក៏ត្រូវបានដោះលែង តែស្ថិតនៅក្រោមការឃ្លាំមើល…
ស្ដាប់មើលទៅ តើគាត់សមជាមនុស្សឆ្កួតដែរទេ? បើគាត់ជាមនុស្សឆ្កួតមែន ប្រហែលជាមនុស្សឆ្កួត ដែលខ្ញុំសរសើរជាលើកទីមួយហើយ 
ប្រភពព័ត៌មាន៖ កោះសន្តិភាព
ដូរ Facebook Chat មកសភាពចាស់វិញ
ថ្មីៗនេះ Facebook បានផ្លាស់ប្ដូររបៀបក្នុងការ Chat ដែលប្រហែលជាចង់សម្រួលដល់ការប្រើប្រាស់ ប៉ុន្តែបំលាស់ប្ដូរនេះបានទទួលរងការមិនពេញចិត្តពីសំណាក់អ្នកប្រើប្រាស់មួយចំនួនទៅវិញ ដោយចោទឡើងពីបញ្ហាផ្សេងៗ។ ដូច្នេះ បើយើងចង់ដូរឲ្យបានកម្មវិធី Chat ដើមវិញ មិនចាំបាច់រិះគន់រហូតដល់គេដូរឲ្យនោះទេ យើងនាំគ្នាផ្លាស់ប្ដូរដោយខ្លួនឯងតែម្ដងទៅ 
ចំណាំ៖ ការប្ដូរ Facebook Chat នេះអាចដំណើរការបានចំពោះ Firefox និង Google Chrome
ចំពោះអ្នកប្រើប្រាស់ Firefox
- ដំបូងយើងត្រូវដំឡើង Add-On មួយឲ្យ Firefox ដែលមានឈ្មោះថា Greasemonkey ។ ក្រោយពីដំឡើងរួច សូម Restart Firefox ឡើងវិញ។
- បន្ទាប់មក ដំឡើង Facebook Sidebar Chat Reversion ដែលជា Script របស់ Greasemonkey ។
- រួចរាល់ហើយ ពេលអ្នកបើក Facebook និងឃើញថាកម្មវិធី Chat ត្រលប់មករកសភាពកាលពីមុនវិញ
ចំពោះអ្នកប្រើប្រាស់ Google Chrome
- អ្នកគ្រាន់តែដំឡើង Facebook Sidebar Chat Reversion រួចជាការស្រេច ដោយមិនបាច់ដំឡើង Greasemonkey នោះទេ។
ពេលនេះយើងអាចប្រើ Facebook Chat ចាស់វិញបានហើយ!
ឯកសារយោង៖ The Heat Web
ឈុតកម្ពុជាក្នុងរឿង Transformers 3
យើងទាំងអស់គ្នាសុទ្ធតែឮព៍ត៌មានថាអ្នកដឹកនាំរឿង Transformers: Dark of the Moon បានជ្រើសរើសប្រទេសកម្ពុជាដើម្បីថតឈុតមួយនៅក្នុងរឿង។ ខាងក្រោមនេះគឺជាវីដេអូដែលបញ្ជាំងពីឈុតថតនៅកម្ពុជា មានរយៈពេលប្រហែល ១១ វិនាទី (ដូចជាខ្លីបន្តិចហើយ ) គឺនៅពេលដែលពួក Decepticons ចាប់ដំឡើងម៉ាស៊ីន (Pillars) នៅជុំវិញពិភពលោក។ ក្នុងឈុតនេះ យើងអាចឃើញ ប្រាសាទតាព្រហ្ម ប្រាសាទបាយ័ន និងប្រហែលជាខាងស្ដាំផ្លូវចូលប្រាសាទអង្គរវត្ត។
ហើយនេះគឺជាសកម្មភាពថតនៅប្រាសាទបាយ័ន៖
សង្ឃឹមថានៅពេលក្រោយៗ កម្ពុជានឹងមានឱកាសបានបង្ហាញខ្លួនក្នុងភាពយន្តអន្តរជាតិដទៃទៀត
