ល្បែង ស្រី ស្រា…
[…]
ចារុដា៖
ជានិច្ចកាល ឮតែល្បែង ស្រីនិងស្រា មេត្រី កាលណាទើបឯងផ្លាស់?
មេត្រី៖
ជម្ងឺឆ្កួតរបស់ខ្ញុំ ស្លូតបូតជាទីបំផុត មិនដូចគេស្មាននោះទេ។ ល្បែងបង្រៀនយើងនូវភាពហីមិនអើពើ ឲ្យចេះលាតបើកដៃ ហើយមើលយ៉ាងសប្បាយរីករាយ ភ្នំមាសមួយគំនរវារលាយបាត់ទៅៗ ជាចំហាយហាក់ដូចជាដំណក់សន្សើមត្រូវកំដៅថ្ងៃ។ កាន់ផ្ទាល់នូវកូនឡុកឡាក់ ធ្វើឲ្យលូតលាស់ការសញ្ជប់សញ្ជឹងពិចារណា។ ការប្រុងប្រយ័ត្នលើស្នៀតខូចរបស់អ្នកលួចបន្លំ សម្រួចភ្នែក និងការចេះដឹងរបស់មនុស្ស។ ការប្រថុយ ធ្វើឲ្យកម្រើករំជួលសេចក្ដីក្លាហាន។ ការចំណេញ បញ្ឆេះទំនុកចិត្តលើខ្លួនឯង រីឯការចាញ់ខាតបង់ បង្រៀននូវការមិនរវីរវល់អើពើយ៉ាងរីករាយជាទីបំផុត។ ចុះរីឯស្រីៗ? ស្រឡាញ់ស្រីៗ ជាសកម្មភាពគ្មានស្វែងចង់បានប្រយោជន៍ ដែលធ្វើឲ្យបរិសុទ្ធស្អាតនូវមនោសញ្ចេតនាមិនរកផលកម្រៃ។ ស្រីៗស្រឡាញ់យើងផ្ដល់មកឲ្យយើងនូវគំនិតសប្បាយមួយប្រភេទលើខ្លួនយើង។ ស្រីៗខ្ពើមយើង ធ្វើឲ្យយើងនឹកឃើញថាយើងគ្មានតម្លៃធំដុំ។ គុណភាពពិសេសបន្តិចបន្តួចដែលខ្ញុំមានសេសសល់ពីនោះទាក់ទងទៅនឹងអបាយមុខរបស់ខ្ញុំទាំងអស់ លោកម្ចាស់!
ចារុដា៖
ចុះជាមួយស្រា ឯងយ៉ាងដូចម្ដេចដែរ?
មេត្រី៖
ច្រើនលើសជាងនេះ ថែមទៀត។ ជំនឿលើអ្នកដទៃ ហើយនិងជំនឿលើខ្ញុំខ្លួនឯង ការភ្លេចនូវទុក្ខសោករបស់ខ្ញុំ ការសម្រាកនៃចំណង់របស់ខ្ញុំ។ ស្រាមើលខ្លួនមនុស្សច្រណែនប្រចណ្ឌឲ្យជា បំភ្លឺអ្នកមានទុក្ខសោក មិនតែប៉ុណ្ណោះ ស្រាផ្ដល់លំអដល់មនុស្សរូបអាក្រក់ ហើយនិងយុវវ័យដល់ព្រឹទ្ធាចារ្យ។ ស្រាផ្ដល់មនុស្សឯកោ នូវមិត្តដែលមានចិត្តស្រឡាញ់ពោរពេញច្រើនថែមទៀត។ ស្រាផ្ដល់គំនិតដល់មនុស្សអស់សង្ឃឹម ផ្ដល់សេចក្ដីសប្បាយដល់អ្នកព្រួយ ផ្ដល់សន្តិភាពដល់អ្នកមានចិត្តព្រួយបារម្ភ។ បើសិនជាគ្មានលោកម្ចាស់ទេ ដោយឥតរារែក ខ្ញុំនិយាយថាស្រាជាមិត្តយ៉ាងប្រាកដប្រជារបស់ខ្ញុំហើយ។
ចារុដា៖
ស្ដាប់ឯងនិយាយទៅ ឮដូចជាមានត្រូវ នៅក្នុងការនិយាយខុសរបស់ឯងដែរ។ កាលណាឯងស្រវឹង ឯងយកអ្នកដែលឯងជួបទាំងប៉ុន្មានជាមិត្ត។ មិត្តឯងទាំងអស់នោះ ប្រហែលជាមានតម្លៃគ្រាន់បើជាងមិត្តកាលអញនៅមានទ្រព្យ ពីព្រោះថា សេចក្ដីក្រខ្សត់បានមកដណ្ដើមយកពីអញអស់ទៅវិញ។ អញមិននិយាយឲ្យឯងទេ មេត្រី ពីព្រោះឯងនៅភក្ដីនឹងអញ តាំងពីអញវិនាសហិនហោចទ្រព្យសម្បត្តិអស់ទៅ។
[…]
(ដកស្រង់ចេញពីរឿង រទេះដីឥដ្ឋ ដោយ ក្សត្រក្លឹង្គ បកប្រែសម្រួលពីភាសាបារាំងដោយ នួន កន)
Posted on ខែសីហា 18, 2011, in ខ្មែរ, មេរៀនជីវិត, Opinions, Zen Stories and tagged គំនិត, ទស្សនៈ, មេរៀនជីវិត, ideas, knwledge, lesson of life. Bookmark the permalink. បញ្ចេញមតិ.
បញ្ចេញមតិ
មតិ (1)